7 जनवरी के 2 हजार गाड़ी के जबर काफिला रइपुर ले रवान होके हसदेव अरण्य जंगल पहुँचही- जोहार छत्तीसगढ़ पार्टी
7 जनवरी 2024 दिन इतवार के हसदेव अरण्य ल बचाए बर सर्वदलीय संगठन रायपुर ले हसदेव के हरिहरपुर तक मोटर (गाड़ी) रैली के रूप मे जाहि
रायपुर — हसदेव जंगल ल बचाये के मुहिम लेके रायपुर सिलतार ले बिहान 07 बजे जोहार छत्तीसगढ़ पार्टी अउ सर्व छत्तीसगढ़िया समाज के सर्वदलीय संगठन मोटर गाड़ी रैली के रूप म हसदेव जंगल बर निकलही, अउ उँहा जंगल बचाये के आंदोलन म बइठे ग्रामीण आदिवासी आंदोलनकारी मनखे मन ले भेंट कर के हसदेव जंगल ल कटे ले बचाये के पूरा समर्थन दिही।
जेन आदिवासी भाई बहिनी मन हसदेव बचाए बर सरलग 10 साल से आंदोलन करत हे, रेंगत-रेंगत हसदेव ले रायपुर आके राज्यपाल ल ज्ञापन सौपीस, जेकर चलते हसदेव आज जिन्दा हे, वो मन ला 7 तारीख के जोहार छत्तीसगढ़ पार्टी के मनखे मन हरिहरपुर धरना स्थल पहुंच के संबल दिही अऊ आस्वस्त करही के हसदेव बचाए के लड़ाई म हमु मन तुहर संग हन।
ऐखर संग छत्तीसगढ़िया क्रांति सेना संगठन अउ जोहार छत्तीसगढ़ पार्टी के पदाधिकारी मन अउ दूसर संगठन मन ले निवेदन करे हवय के, आपमन भी अपन-अपन गाड़ी से हसदेव रैली के रूप म चलव, आप कोन्हो भी दल (राजनीतिक या गैर राजनीतिक) के रहव, कोन्हो भी सामाजिक कोन्हो व्यापारिक संगठन के रहव, आप अपन समाज दल अऊ संगठन के झंडा, बैनर अपन गाड़ी म लगा के हसदेव बचाव के रैली म चल सकत हव, आपमन ल एक पोस्टर रैली आयोजक मन डहर ले दिए जाहि, जेमा कोन्हो राजनीति दल, गैरराजनीतिक दल, समाज, संगठन के चिन्ह, मोनो नई रहे, वोमा सिर्फ #savehadeo अऊ #हसदेवबचाव लिखे रही, जेला आपला अपन गाड़ी के बोनट अऊ पीछे ग्लास मे लगाना हे, जेकर से एकरूपता अऊ रैली म सामिल गाड़ी के रूप मे आपके गाड़ी पहचाने जाहि।
जेन मन हसदेव बचाये के उदिम म संग दे बर रैली म सामिल होना चाहत हे तेखर मन बर रैली के रूप रेखा जारी करे गे हे जेमा रैली ठीक 7 बजे सिलतरा चाैक (रायपुर-बिलासपुर हाइवे मेन रोड) से निकलही अउ 2 बजे हरिहरपुर धरना स्थल पहुंचना के, 2:30 से 6 बजे तक आंदोलन करईया ग्रामीण मन के संग भेंट कर के उंखर सहयोग कर के, 6:30 बजे तक वापसी होही।
